由於當年第一集東寶《哥斯拉》係於1954年11月3日上映，所以往後呢年都被稱為「哥斯拉日」，官方亦會舉行不同活動慶祝或宣佈動向。而就喺琴日嘅最新一次「哥斯拉日」中，東寶就公開咗系列下一部電影嘅標題《哥斯拉 -0.0》（讀法係「負零」），並將由上集導演山崎貴繼續執導。

《哥斯拉 -0.0》標題

話說昨日舉行嘅「哥斯拉節2025」中，東寶公佈系列下一作題名為《哥斯拉 -0.0》，明顯就係上集《哥斯拉 -1.0》嘅續作。新戲將繼續由山崎貴身兼導演、編劇及視覺特效總監三職。目前除上述資料以及一個戲名Logo之外，演員、故事甚至上映時間一切都未有公佈。所以睇黎都要等好一段時間大家先會真係睇到套戲。

上集《哥斯拉 -1.0》宣傳圖

以出色嘅視覺特效聞名嘅山崎貴為日本名導，過去曾執導《永遠的三丁目的夕陽》（2005），木村拓哉主演嘅真人版《宇宙戰艦大和號》（2010），以及染谷將太主演嘅真人版《寄生獸》（2014）等電影。而哥斯拉系列嘅上一集、系列第30部電影兼70週年紀念作嘅《哥斯拉 -1.0》亦係由佢執導，而且票房仲非常好，日本加海外票房收一億美金，成為史上票房最高嘅日本《哥斯拉》電影，仲於去年嘅奧斯卡金像獎獲得最佳視覺效果，成為第一部榮獲此獎嘅日本電影。

資料來源：Livedoor News