由Rockstar Games製作嘅《Grand Theft Auto（GTA）》系列，陪伴玩家超過20年，不論係Vice City、San Andreas、Los Santos定Liberty City，都係充滿美國味嘅虛構城市，系列至今都未試過以非美國地區為遊戲舞台。對此，Rockstar共同創辦人兼前首席編劇Dan Houser就親自解釋箇中原因：「因為遊戲同美國文化密不可分。」

最近Dan Houser接受Lex Fridman主持嘅Podcast節目訪問，被問到有冇考慮過將遊戲舞台移師到其他地方時。Dan Houser憶述Rockstar曾在1999年，為初代2D版《GTA》推出過《GTA London》任務包，但之後就冇再嘗試，因為呢個系列太多美國元素，如果將背景搬去其他地方好難成功：「你知啦，遊戲入面需要有槍、誇張又個性鮮明嘅角色，呢啲都係好美國特色。」而且《GTA》嘅精髓，就係從一個局外人視角諷刺美國文化，如果將背景換成其他地方，就難以呈現出同樣嘅味道。

至於點解多次選擇邁阿密、紐約同洛杉磯為背景，Dan Houser就表示，因為呢啲地方集合遊戲所需嘅元素：大都市、多元文化、華麗與陰暗並存、移民社群、富豪與草根階層交錯。佢仲形容《GTA》就似一部「瘋狂版狄更斯小說」，入面有唔同社會階層、不同嘅人生軌跡喺大城市混雜、激烈碰撞。

所以，期待會見到《GTA：Tokyo》或者其他海外版本嘅玩家，暫時都可以打消念頭。正如Dan Houser所講，《GTA》嘅靈魂源自美國文化，如果搬去其他地方，就會變咗另一款遊戲。