「Go! Go! Power Ranger！」係唔少人嘅兒時回憶，亦好可能係大家認識日本特攝「超級戰隊」嘅契機（雖然Power Rangers其實係美國重製版）。不過呢個有50年歷史嘅日本特攝片系列卻將迎來終結，有日媒報導指系列收入已經不足以支撐龐大嘅製作費，是以目前播緊嘅《第一戰隊五獸者》就已經係系列最終作。

1975年《祕密戰隊五連者》

據日本《產經新聞》報導，自昭和50年（1975年）《祕密戰隊五連者》開播以來，50年來都一直深受Fans歡迎。與同屬東映旗下嘅另一特攝系列《幪面超人》更成為無數男明星嘅跳板。據知情人士透露，《超級戰隊》系列嘅收入主要依靠活動、週邊販售以及電影票房，但近年嘅收入已經不足以覆蓋高昂嘅拍攝成本，是以東映及朝日電視台決定播完目前嘅《第一戰隊五獸者》之後就唔再製作新作。

值得一提嘅係，《第一戰隊五獸者》係《超級戰隊》系列嘅第49作，亦即係50週年紀念作。

2025年 《第一戰隊五獸者》

《超級戰隊》系列出現於《超人力霸王》(1966年）及《幪面超人》（1971年）之後。當年東映製作人平山亨認為市面上嘅特攝片都以單人英雄為主，加上睇到幪面超人1、2號共演嘅集數非常受歡迎，於是就想開發出一套有多個英雄合作嘅特攝片。呢個想法得到幪面超人原作作者「石之森章太郎」支持，並為佢創作《祕密戰隊五連者》故事，《超級戰隊》系列由此開啟。

值得一提嘅係，《超人力霸王》系列曾於1980年至1996年停止製作、《幪面超人》系列亦有1989年至2000年間嘅空白期，三大特攝中唯有《超級戰隊》自開播以來就維持每年一套，足可證明其受歡迎程度。或者換個角度，《超級戰隊》系列停個十年八載，可能又有機會翻生？

資料來源：產經新聞