無論你係咪系列Fans，呢幾日都一定聽過由Team Cherry開發嘅《Hollow Knigt》（空洞騎士）續作《Silksong》（絲綢之歌）嘅大名。呢隻時隔7年推出嘅續作於9月4日上市當天就引起哄動，大量玩家爭相購買造成Steam等各個遊戲平台暫時癱瘓達兩小時。而業界就有人警告，如果《Silksong》都可以達到咁嘅效果，咁明年5月《GTA 6》推出時情況只會更為嚴重。

據《Game Rant》引述「Downdetector」嘅數據，於太平洋時間9月4日早上7點起，有超過7萬人回報Steam平台出現各種問題，時間上與《Silksong》開售時間相符，亦證明問題出於太多人同時湧入Steam試圖購買《Silksong》。而Xbox、Playstation及Switch嘅商店頁面亦於同一時段出現類似問題，亦即單單一隻《Silksong》就已經癱瘓全球所有大型遊戲平台。

《Silksong》發售後嘅同時在線人數一度高達53萬人，以獨立遊戲黎講已經係一個天文數字，但對比起《GTA 6》可能仍然係小巫見大巫。《GTA 5》於2015年推出首日就已經於全平台賣出1100萬份，到十年後嘅今日於Steam上嘅同時在線時間都維持於10萬人左右，再考慮埋等咗10年先有《GTA 6》，相信發售當刻就可能有百萬計玩家爭先購買，對各大遊戲平台嘅壓力將會遠超《Silksong》。如果各大平台唔喺未來數月內增加負載量，相信《GTA 6》推出時嘅當機情況會更加嚴重。

資料來源：GameRant