近日任天堂在Gamescom 2025上，展出多款已推出或即將推出嘅Switch 2第三方移植遊戲，並提供試玩。當中最受矚目嘅莫過於FromSoftware開發嘅《艾爾登法環 褪色者版（ELDEN RING Tarnished Edition）》，呢款Switch 2移植版除咗包含遊戲本篇同DLC《黃金樹幽影》，仲有全新武器及靈馬外觀。不過，唔少外媒試玩完都表示遊戲體驗非常糟糕，存在嚴重效能問題。

據Nintendo Life、IGN及GVG等遊戲傳媒嘅「手持模式（handheld mode）」試玩報告，喺新手教學部分因為係封閉場景，表現仲算穩定，但當離開教學區域進入開放世界後，遊戲就頻頻出現掉幀同卡頓問題，轉動鏡頭時幀率明顯下降，再加上Switch 2按鍵佈局混亂，令戰鬥同探索體驗都相當糟糕。Nintendo Life特派記者Felix甚至表示，遊戲感覺只有20FPS左右，有時仲會覺得好似跌到15FPS。由於現場禁止拍攝，所以暫時未有實機影片，而《艾爾登法環 褪色者版》亦係場內少數禁止拍攝嘅試玩遊戲

對此，記者就認為今次嘅試玩版可能只係早期開發版本，或者官方會在後續改善問題、最佳化效，並寄望「底座模式（dock mode）」會有更好嘅表現。各位機迷不妨再觀望一下再決定是否入手，畢竟呢類講求流暢操作嘅遊戲，打王時疾機比卡關更加激氣！

雖然「手持模式」暫時未有實機影片，不過「底座模式」似乎幾順暢？