著名荷里活演員Denzel Washington（丹素華盛頓）曾獲得9次奧斯卡提名，並憑《Glory（光榮）》及《Training Day（邊緣特訓）》分別奪得過奧斯卡最佳男主角及男配角。不過，佢最近接受訪問時就直言，佢並唔在乎呢啲所謂嘅事業里程碑，仲話自己演藝生涯中所有決定都唔係為咗拎獎。

Denzel Washington為宣傳新作《Highest 2 Lowest》接受節目「Jake’s Takes」訪問，當主持人講笑咁話佢嘅獎盃架應該已經冇位再放奧斯卡小金人時，Denzel Washington就直言：「我唔係為奧斯卡而拍戲，我唔在乎呢啲嘢。我入行咁多年，有時候我拎咗獎，但其實唔應該拎；有時候我冇拎到獎，但其實應該拎。獎由人給，賞由天賜。（Man gives the award, God gives the reward. ）所以我對奧斯卡真係冇乜興趣。」佢仲提到：「當有人問我啲奧斯卡獎放喺邊度，我都會話放喺另一座奧斯卡獎隔離囉。我唔係炫耀，只係講出我嘅真實感受。當我生命到達最後一天時，呢啲獎對我毫無用處。」

事實上，Denzel Washington一向對獎項睇得好淡。例如在今年初，佢因為未能憑《Gladiator II（帝國驕雄II）》入圍奧斯卡最佳男配角，而被外界形容為一大遺珠，但佢似乎完全無所謂，接受《紐約時報》訪問時仲講笑咁話：「Are you kidding me？嘩，我好傷心呀～。我為所有入圍嘅人感到開心，我亦都好滿意而家做緊嘅嘢。」

除此之外，曾經同佢合作過《Training Day》嘅Ethan Hawke在去年亦在節目中透露：「當年我落選奧斯卡最佳男配角後，坐喺旁邊嘅Denzel Washington同我講：『輸咗更好。』並表示：『你唔需要一個獎項提升自己嘅地位，而係要令獎項嘅價值因為你嘅地位而提升。』呢個就係佢嘅思維模式。」