風靡全球多年嘅著名MOBA遊戲《英雄聯盟》（League of Legends，簡稱LoL）最近公布一項重大更新！遊戲將首次引入「WASD」鍵盤操作方式，打破16年嚟一貫嘅滑鼠點擊移動模式，旨在降低新玩家入門門檻，同時為回流嘅老玩家提供更直觀操作方式。唔知各位已經棄坑，或者轉玩自走棋嘅LoL玩家，又會唔會因為呢新功能回歸呢？

據Riot Games「開發新訊」表示，為咗令新玩家更容易上手，官方將於未來數次更新中，率先在PBE公測伺服器引入WASD操作方式，並進行長時間測試及改善修正，其後再推廣到正式伺服器嘅非積分對戰模式﹐最後全面應用到積分對戰及職業賽場。官方強調，呢項新操作方式並唔會取代原有嘅滑鼠點擊模式，而係讓玩家能夠按喜好自由切換操作方式。

為確保兩種操作模式公平，官方會針對部分角色技能進行微調，例如好運姐（Miss Fortune）開大招時，用WASD操作唔會導致技能中斷。另外，Riot Games亦提到，佢哋喺測試期間發現，WASD操作可能令某些角色更易上手，特別係需要精準走位同「拉打」嘅ADC。因此，開發團隊將會持續監察並作出相應調整，確保滑鼠點擊同WASD操作之間保持平衡，讓玩家在任何模式下都能夠享有公平嘅遊戲體驗。