近來兩部超級英雄電影《Superman》及《Fantastic Four: First Step》嘅票房成績都非常唔錯，前者最近更打破紀錄，成為歷史上北美票房最高嘅超人電影。不過電影嘅海外票房就頗為疲弱，可能會限制電影總票房成績。

跟據Box Mojo上嘅票房數字，《Superman》於7月28日嘅北美總票房達到2.92億美金，成功超越2013年由Henry Cavill主演、Zack Snyder執導嘅DCEU「開山作」《Man of Steel》嘅2.91億美金，成為史上北美票房最高嘅超人電影。《Screenrant》分析指出《Superman》能打破紀錄，證明「超人」呢個IP依然有市場，而且觀眾對於James Gunn執掌嘅DCU接受良好。簡單黎講就即係開咗個好頭。

但值得注意嘅係，上面提到嘅「最高票房」只睇帳面數字，並無考慮通漲。如果要計埋通漲的話，1978年由Christopher Reeve主演嘅首部《Superman》嘅北美本土票房將高達8.76億（帳面為1.34億），基本上無可能被超越。另外上面亦只計以超人為單一主角嘅電影，如果將「有Superman份」嘅電影都加入考慮，最高北美票房嘅係2016年《Batman v Superman: Dawn of Justice》，達3.3億。

圖片：截圖自Box Mojo

但相比起北美票房，新《Superman》嘅海外票房就唔算太樂觀。同樣截止7月28日，《Superman》嘅海外票房僅為2.14億美金；與之相比，《Man of Steel》嘅海外票房就有近3.8億，大幅拋離前者近八成。而亦因為海外票房不如理想，所以《Superman》嘅總票房亦因而受限，目前僅得5.06億。唔單止比《Man of Steel》嘅6.7億低，甚至比唔上2017年上映，北美本土僅收2.29億、但海外票房有4.32億嘅《Justice League》。

James Gunn早前接受訪問時提到，《Superman》嘅海外票房可能與近年其他國家嘅反美情緒高漲有關，換言之其實算係「不可抗力」。但另一邊廂，其實亦有可能係過去幾年嘅DC電影令觀眾多次失望，所以唔少人都對《Superman》持保守態度。如果DCU嘅電影質素能夠保持的話，未來嘅海外票房應該會有所改善。

資料來源：Screenrant