為防止未成年用戶接觸「不當內容」，近期英國正式實施網絡安全法（Online Safety Act），要求境內所有提供成人內容嘅網站及應用程式，必需加入強而有效嘅年齡驗證機制，唔再好似以往咁撳一下「我已滿18歲」就得。現時驗證方法主要係上傳身份證、信用卡等個人資料，又或者即時自拍估算年齡。然而，有玩家就意外發現《死亡擱淺》竟然可以破解驗證系統，究竟係遊戲角色建模太逼真，定還是驗證系統太渣？

You can use Death Stranding's photo mode to bypass Discord's age verification https://t.co/o9n0c0lwkI pic.twitter.com/mvYmhZZCVp

— Dany Sterkhov (@DanySterkhov) July 25, 2025

隨住新法案實施，除咗Pornhub等著名成人網站，就連Reddit、Discord、Bluesky等一般社交平台，如果想瀏覽亦成人討論版塊板或頻道，都要求用戶上傳相關資料驗證年齡。正所謂「上有政策下有對策」，嫌麻煩或擔心隱私外洩嘅網民就各出奇招繞過驗證，其中最簡單當然係使用VPN，但亦有玩家忽發奇想，試圖用遊戲角色肖像破解年齡驗證，結果又真係行得通！

據外媒《Dexerto》報導，有玩家透過《死亡擱淺》嘅拍照模式（第一或第二集都得），讓角色做出系統要求嘅表情動作，例如張嘴、合嘴，結果成功蒙混過關。相信小島秀夫都估唔到，為咗提升遊戲沉浸感而製作嘅超逼真角色建模，如今竟然有呢個「新用途」。除此之外，有網民提到《Baldur’s Gate 3》同《WWE 2K25》嘅拍照模式亦能夠成功欺騙系統。