隨住異形前傳劇集《Alien: Earth（異形：地球）》將於下月正式播出，官方今日公開全新預告，曝光更多新畫面！當「異形」降臨到地球上，人類又會如何應對？

《Alien: Earth》由美劇《Fargo（雪花高離奇命案）》主創Noah Hawley操刀、《異形》系列靈魂人物Ridley Scott坐鎮監製。故事背景設定在《Alien: Covenant（異形：聖約）》16年後、首集《異形》2年之前嘅2120年。當時地球分別由Prodigy、Weyland-Yutani、Lynch、Dynamic及Threshold五間大企業統治，人類與「改造人 」（cyborg，具有人工部件嘅人類）及「合成人」（synthetic robot ，具有人工智能嘅人型機械人）和平共存，直至Prodigy公司創造出首款「混種機械人」（hybrid，植入人類意識嘅人形機械人）後，世界從此踏入一場全新嘅科技競賽。

一切事情源於Weyland-Yutani嘅神秘太空船「馬其諾號」突然墜毀在Prodigy City（以Prodigy公司命名嘅城市），世上首位混種機械人「Wendy」（Sydney Chandler 飾）連同其他混種機械人朋友奉命調查殘骸，結果意外發現船上載有5種恐怖外星生物——異形！有關當局隨即下令封鎖飛船，否則後果不堪設想。除此之外，Wendy仲喺預告講咗句充滿哲思嘅對白：「如果我唔係人類，咁我係咩嘢？」期待劇集會對人工智能與人性嘅議題有所著墨。

《Alien: Earth》將於今年8月13日在Disney+正式播出，首兩集一齊上架，其後每星期播出一集，全季共8集。