Pixar最新原創動畫《Hoppers（狸想奇兵）》今日公開首部預告，故事講述科學家經過多年努力，終於研發出一款名為「hopping（跳躍傳送）」技術，能夠將人類意識轉移到動物機械人身上，仲可以同動物無障礙溝通。女主角Mabel（美寶）係一個超愛動物嘅人，為咗保護當地環境免受建築公司破壞，於是用該技術將自己意識轉移到一隻海狸機械人身上，展開一場自然世界探索之旅。

在預告中，製作團隊首先自嘲故事設定同《阿凡達》有啲似。當Mabel得知「hopping」技術原理後，就忍唔住講咗句：「即係《阿凡達》咁樣啦。」激到科學家們即時反駁：「絕對唔似《阿凡達》！」然後Mabel戴上裝置化成身一隻海狸，發現自己竟然聽得明動物講嘢，感到既新奇又興奮。當中最有趣嘅一幕，就係Mabel喺池塘救咗一隻差啲畀熊人食咗嘅海狸，點知呢個舉動令兩隻動物都感到莫名其妙，並解釋池塘有既定「規矩」，畢竟熊人需要進食，而被捉到嘅海狸亦表現得完全唔介意被食，仲要向熊人補多句：「咁...你仲想唔想食我？」令到場面變得非常尷尬。睇嚟Mabel將會慢慢學懂動物世界嘅各種規律。

《Hoppers》由《We Bare Bears（熊熊遇見你）》主創Daniel Chong執導及編劇，Piper Curda為主角Mabel Tanaka配音、Bobby Moynihan聲演統治動物王國嘅海狸國王King George、Jon Hamm則聲演打算摧毀動物棲息地嘅反派市長Mayor Jerry，電影預計2026年3日上映。