Pixar動畫工作室新作《外星奇遇記（Elio）》上周五在北美正式上映，開畫首周未三日僅收2,100萬美元票房遜預期，而海外票房亦同樣慘淡，難道Pixar原創動畫嘅號召力已不復當年勇？

據票房統計網站《Box Mojo Office》數據，《外星奇遇記》在北美開畫首周未3天票房為2,100萬美元，遠低於業界預期嘅2,500至3,000萬美元，創下Pixar近代史上最差開畫紀錄，而海外票房亦同樣慘淡僅收1,400萬美元，全球合共進帳3,500萬美元。

對此，電影顧問公司FranchiseRe負責人David A. Gross表示：「呢個成績對於一般原創動畫嚟講算係唔錯，不過呢部係Pixar動畫，以Pixar呢個品牌嚟講，呢個開畫成績絕對唔達標。」另外有分析指，由於電影同真人版《馴龍記》及《史迪仔》等合家歡電影撞期，而觀眾又會偏向選擇熟悉嘅作品，而非全新角色同故事，所以《外星奇遇記》票房先咁慘淡。

值得一提嘅係，2023年《元素大都會（Elemental）》開畫時北美票房都只得2,960萬美元，但後來憑住觀眾口碑成功逆轉，最終在全球斬獲4.96億美元。雖然遠遠未達到《反斗奇兵（Toy Story）》、《海底奇兵（Finding Nemo）》、《超人特工隊 （The Incredibles）》嘅輝煌成績，但都叫做合格有餘。目前《外星奇遇記》在影評網站爛番茄上分別獲得84％新鮮度及91％觀眾評分，究竟會唔會好似《元素大都會》咁低開高走仍有待觀察。