由James Gunn執導嘅全新《超人》電影將於下月正式上映，飾演Lois Lane嘅Rachel Brosnahan日前接受訪問時就表明，無論電影成唔成功，佢都唔會事後投訴。並直言演員唔應該拍完超級英雄片後，見到部戲唔掂就回頭抱怨。莫非係指緊將《蜘蛛夫人》失敗歸咎於電影公司高層嘅Dakota Johnson？

最近Rachel Brosnahan接受《Interview》雜誌訪問時提到：「我真係唔明點解有人答應接拍一部電影，之後又要回頭投訴。我唔係想批評其他演員，但曾經有一段時間，好似非常流行唔like超級英雄電影，甚至會回頭貶低自己演過嘅超英片。我覺得，一係就唔好接，接咗就力撐到底。」

雖然Rachel Brosnahan無指名道姓，但近年確實有唔少超英片演員因為電影反應唔好，而公開同作品割席。例如Dakota Johnson早前先話《蜘蛛夫人》票房口碑仆直唔關佢事，錯嘅係電影公司高層。仲有早幾年前，《雷神奇俠4：愛與雷霆》遭影評人狂插後，Chris Hemsworth承認電影確實太低B（too silly），又話自己當時陷入咗一種追求即興表演嘅古怪狀態，就好似自己模仿自己，冇好好完成使命。

《超人》將於7月10日在香港正式上映，但Rachel Brosnahan已經表明如果有續集嘅話，佢非常樂意回歸。