HBO《最後生還者》主創Craig Mazin明確表示，佢今後唔會再改編其他電子遊戲，換言之《最後生還者》將會係佢生涯第一部，同時亦係最後一部遊戲改編作品。

最近Craig Mazin接受外媒《SciFiNow》訪問，被問到如果可以改編其他遊戲，會選擇邊一部時。Craig Mazin笑住回答：「我當然唔會再改編啦，仲有咩可以超越《最後生還者》？但如果真係要選擇一部，我會話係《GTA 4》，因為我係一個自虐狂，而且我認為可以拍到19季咁多，哈哈！但另一方面，我又會覺得不如選擇一個毫無故事可言嘅遊戲改編啦，例如《Candy Crush》？」
雖然佢唔會親自再操刀改編，但Craig Mazin表示仍然樂意參與其他優秀嘅電玩改編項目：「我好期待睇其他人點樣改編，就算要我幫手都無問題。我好樂意協助製作一啲出色嘅電玩改編項目，腦海入面亦有好幾個想法。但講到親自日日寫劇本同全程投入製作，《最後生還者》已經係我最後一部電影改編作品。」

目前HBO已宣布續訂《最後生還者》第3季，按照原作劇情推演的話，預計第3季故事將會切換至Abby嘅視角展開，觀眾有可能會成季都見唔到Ellie。