Netflix人氣劇集《Stanger Things》（怪奇物語）經歷九年發展，第五季同時亦係最終季終於今年年尾播出。近日Netflix於官方姊妹網站「TUDUM」嘅宣傳活動上，就公開咗第五季嘅首條預告，同時公佈第五季嘅上線時間，最快11月26日就有得睇啦。

預告Winona Ryder飾演嘅Joyce以及其兒子Noah Schnapp飾演嘅Will對話開始，Joyce提到自己忘不了第一季中Will被擄入神秘世界當日，並指嗰日係一切事情嘅開端。然後預告就以蒙太奇手法回顧過去四季發生過嘅事，以喚起觀眾們嘅記憶。至於第五季上線時間就於預告中段公佈，第五季將會分成三部份上線，第一部份於11月26日美國感恩節期間上線，然後要等一個月到聖誕節正日先有第二部份，好在之後等多幾日，到12月31日除夕第三部份就會上線。睇黎Netflix係打算成個年尾假期都留大家喺屋企睇電視。

至於預告後半段就有閃現多個新一季嘅畫面，最後以Will青筋暴現、聲嘶力竭地大叫「Run!」作結。

雖然睇條預告係唔會知道第五季究竟發生緊咩事，但好在Netflix事後有公佈埋新一季嘅劇情大綱：「1987年秋季，霍金斯鎮被顛倒世界的開啟震驚，我們的英雄們為了一個目的而聯手：找出並殺死維克那。但他消失了，無人知道他的去向及計劃。」

「令事情更複雜的，是政府決定以軍隊封鎖霍金斯鎮以追捕Eleven，逼使她重新躲藏。隨著 Will 失蹤周年紀念的逼近，一種沉重而熟悉的恐懼也隨之而來。 最後一戰迫在眉睫，而隨之而來的，是比他們之前面對的任何事都更強大、更致命的黑暗。要結束這場噩夢，他們需要所有人——整個團隊——最後一次站在一起。」