著名遊戲製作人小島秀夫日前在Podcast節目《KOJI10》，大談將現實時間融入遊戲嘅奇思妙想。除咗提到佢之前作品用過嘅時間機制，仲分享咗一啲未有機會實現全新Idea，包括角色會隨時間變老，以及太耐冇開遊戲，角色會遺忘技能，迫使玩家快速通關。

談到遊戲時間機制，小島秀夫提到佢喺2004年開發嘅PS2遊戲《Metal Gear Solid 3: Snake Eater》，為咗提升真實感，加入了食物會隨時間腐爛嘅設定。如果主角Snake唔小心食咗變壞嘅食物就會嘔吐，有聰明嘅玩家就利用呢個機制，拎腐爛食物引誘飢餓嘅敵人，藉此削弱對方體力。另外，遊戲中入面有個難打嘅BOSS「The End」，但佢加插咗一個「偷雞」嘅就方法，就係當玩家存檔後等足一個星期唔玩，重新打開遊戲後就會觸發隱藏劇情，見到Tne End因為年老而自然死亡。

小島秀夫更透露，佢原本計劃喺《死亡擱淺2：冥灘之上》加入鬍鬚生長系統，主角Sam嘅鬍鬚會隨時間生長，如果玩家唔定期剃鬚，就會變得好邋遢。不過考慮到主角由大明星Norman Reedus演出，唔想佢形象變到咁不修邊幅，最終放棄咗呢個設計，但唔排除未來會喺其他遊戲使用。

除此之外，小島秀夫仲分享咗三個以現實時間為核心嘅遊戲構想。第一個係「人生模擬」遊戲，玩家將由BB時期開始，隨時間長大為少年、成人，再到老年。年輕時跑得快、體力好，但到咗60歲就會變慢、視力衰退、仲有老花。不過年紀大嘅角色會有更多知識同經驗，影響對敵策略。對此，小島就笑言：「但咁嘅遊戲可能無人買！」不過節目其他嘉賓就覺得呢款遊戲好有「小島風格」非常有趣。第二個構想係一款「養成」遊戲，玩家要製作需要長時間成熟嘅東西，例如紅酒或者芝士，要持續玩好長時間，適成製作成背景/放置型遊戲。

而第三個構想就係「遺忘遊戲」，喺呢個遊戲入面，如果玩家停玩太耐，主角會慢慢忘記重要嘅資訊同技能，例如點樣開槍，甚至連自己嘅任務都唔記得！如果長時間唔玩，主角仲會完全癱瘓，郁都郁唔到。小島笑住表示：「玩家們可能要請一星期假，專心打爆機！」