Netflix聯席行政總裁Ted Sarandos日前出席世界經濟峰會，被問到何為至今仍未進軍中國市場時，佢就坦言公司並唔係冇試過，只係試咗三年都冇任何一集劇集能夠通過審查，最終唯有放棄。

Ted Sarandos表示，在15年前，大部份荷里活電影人都覺得中國市場非常重要，甚至認為電影要突破10億美元票房，中國市場係唯一出路。於是佢亦花咗好幾年時間嘗試開拓中國市場，仲同當地一間第三方公司合作（即「愛奇藝」），以將劇集授權到對方平台播出，希望藉此打入中國市場。

然而，喺中國上映嘅電影及劇集都必須經過中國審查委員會嘅審核。Netflix試咗三年，但都冇任何一集節目成功過審。令Ted Sarandos覺得有關當局似乎對Netflix進入中國市場毫無興趣，最終只能無奈放棄。

Ted Sarandos更提到：「我眼見好多公司都花咗十幾年時間，竭盡全力打入中國市場，但結果都同我一樣，一無所獲。」不過正因為咁，Netlfix能夠成為少數唔受中國審查制度、稅收及關稅影響嘅美國公司，並強調雖然冇咗中國市場，但世界其他地方仍非常歡迎Netflix進駐。