隨住依家由大人到細路都電話不離手、又成日對住部電腦，越黎越多人嘅視力出現問題，甚至有唔少人已經去到唔戴眼鏡就咩都睇唔清嘅景況。對佢哋黎講，沖涼時要除低眼鏡係一件非常麻煩嘅事，但唔除又會整濕副眼鏡，又或起哂霧同樣咩都睇唔到。有見及此，日本「メガネストアー」推出嘅「沖涼/桑拿用眼鏡」近日就獲得日本網民追捧！

圖片：meganestore.co.jp

「メガネストアー」推出嘅呢副「風呂眼鏡」，係同日本著名浴盤品牌「ケロリン」合作，最大賣點在於鏡片加上防霧塗層，同時整副眼鏡都係用上塑膠製成，主色仲要係與「ケロリン」相同嘅黃色，方便視力唔好嘅人都可以一眼認到。

主體用上塑膠仲有另一個好處，就係方便大家拎入桑拿房中使用。據報「メガネストアー」就係見到近年日本掀起一股桑拿熱，又了解到一般眼鏡上嘅金屬零件於桑拿房會變得非常辣手，甚至造成燙傷，所以先萌生起製作呢個眼鏡嘅念頭。對於唔太會焗桑拿嘅一般人黎講，亦可以帶去沖涼、浸浴或者浸溫泉，咁無論你係想睇片定睇人都冇問題啦！

圖片：meganestore.co.jp

「風呂眼鏡」有三隻顏色，同時有鏡片亦有5個度數方便不同視力嘅人選擇，附送嘅眼鏡盒上亦有開窿方便去水及通風。而且於日本樂天上嘅售價只係6,578Yen（約HK$360），算係非常相宜，難怪去年推出後一度買到斷貨。如果你都有呢個需要的話，不妨都考慮入手。

資料來源：メガネストアー