任天堂新一代遊戲機Switch 2開賣在即，除咗效能明顯提升，價格亦由初代嘅299美元升至449美元，幾乎同Sony嘅PS5睇齊，令唔少玩家覺得定價過高，唔值得入手。對於呢啲聲音，美國任天堂總裁Doug Bowser就認為Switch 2定價合理，若然負擔唔起建議去玩初代Switch，同樣可以享受到任天堂遊戲嘅樂趣。

美國任天堂總裁Doug Bowser早前接受《CBC Canada》專訪，談到新機價格爭議時，佢就認為考慮到Swtich 2帶嚟嘅新功能及遊戲體驗，呢個定價係合理。並表示任天堂明白有啲玩家可能負擔唔起Switch 2嘅價格，所以公司會繼續出售及支援初代Switch，讓大家有機會加入任天堂嘅遊戲世界，成為其中一份子。

雖然Doug Bowser未有透露Switch 2嘅具體銷售目標，但佢深信新機能夠同初代一樣成功。確確非常有野心，事關初代Switch在全球銷量已高達1.5億部，成為史上第三暢銷遊戲機。唔知大家又覺得Switch 2嘅定價合唔合理呢？