{ SKIP }
文:MenClub 艾力克  
POSTED ON 11 Mar 2025

HBO真人版《最後生還者》第2季即將在下月正式播出,除咗Joel同Ellie兩大主角會強勢回歸,今季仲會加入極具爭議嘅新角色Abby。若然劇情真係跟足原著遊戲發展,分分鐘會引起觀眾激烈反彈。對此,飾演Abby嘅Kaitlyn Dever最近就坦言,雖然好難完全唔睇網上嘅討論,但佢最關心嘅都係如何演好呢個角色。

自從《最後生還者 第II章》遊戲推出後,Abby呢個角色一直備受爭議及批評,有激進嘅玩家甚至因為不滿劇情安排,而走去騷擾Naughty Dog主席Neil Druckmann,以及Abby配音員Laura Bailey,恐嚇要傷害佢哋嘅屋企人。有見及此,HBO拍攝第二季劇集時都特別加強Kaitlyn Dever嘅保安措施,以防萬一。

最近Kaitlyn Dever接受外媒《ScreenRant》訪問,被問到會否留意網民對Abby呢個角色嘅期待,定還是專注做好自己詮釋時,Kaitlyn Dever坦言:「真係好難完全唔睇網上嘅討論,尤其係接呢個角色之前,難免會掃到幾眼。我好希望能夠公正地詮釋呢個角色,令Fans們感到滿意。對我嚟講,最重要嘅係同Neil Druckmann與Craig Mazin緊密合作,確保自己能夠捕捉到Abby嘅神髓——佢嘅動力、情緒狀態、憤怒、挫折及悲痛等。我想將大部分心力集中喺呢啲地方。」

話雖如此,但第二季劇情都未必會跟足原著。主創Craig Mazin日前被問到觀眾是否知道劇情走向時,佢先係表示:「佢哋以為自己估到」然後再次強調第二季改編幅度同首季一樣,即係有啲位會跟原著,有啲位會大改或刪走,並叫熟悉原作嘅機迷準備好會睇到一啲意想不到嘅事情。最後仲拍心口保證:「只要你相信我哋,等到季終嗰日,包保各位會高興滿意。」

《最後生還者》第2季將於4月13日正式播出,總共有7集,究竟班編劇會點樣處理呢個燙手山芋,又可唔可以扭轉原著嘅負面聲浪呢?各位拭目以待吧!

資料來源:ScreenRantIGN
由金像大導James Cameron操刀嘅《阿凡達:火與燼(Avatar: Fire and Ash)》將於下月正式上映,但佢最近接受訪問時就坦言,若然今集賺得唔夠多、無法說服迪士尼再投資。咁佢就會放棄拍攝第4及第5集,改為寫一本書交 ...
hobby
【影視】 James Cameron直言《阿凡達3》若票房未達標 或終止後續電影改為寫書交代故事
28 Nov 2025
為慶祝高達全新官網GUNDAM Official Website正式上線,官方自10月10日起展開特別企劃《全世界高達總選舉2025》,邀請全球Fans票選出世上最受歡迎高達。隨住投票將於12月25日截止,近日官方公布中期結果Top 20名單, ...
hobby
【高達】《全世界高達總選舉2025》中期結果出爐 SEED系列機體強勢佔多席位
28 Nov 2025