如果你都有收藏某啲嘢嘅習慣，你或者能夠理解點解有人會為咗某件收藏一擲千金。但你未必知道嘅，只要夠特別，就算係一舊零食都可以賣出幾十萬高價。近日，一舊生得好似《Pokemon》噴火龍嘅奇多（Cheetos）被拍賣，最終價格竟然高達近70萬港幣，創下同類（即係零食）拍賣嘅歷史高價。

據美國拍賣行、有自己Netflix節目嘅「Goldin」於官方X上嘅發文，呢舊被命名為「Cheetozard」（Cheetos及噴火龍英文Charizard嘅混合字）嘅奇多於上週日成功賣出，最終售價高達87,840美金，即約港幣68.3萬元。據外媒報導，整個拍賣過程非常激烈，全場叫出多達60口價，並一直持續到當地凌晨先結束。

而「Cheetozard」嘅賣家係一間叫「1st and Goal Collectibles」嘅美國收藏品店。據佢哋於去年4月嘅IG帖文表示，佢哋早於5年前就收購咗「Cheetozard」，但放咗入夾萬之後就冇咗回事，直到4月時清倉時先搵返出黎。隨後佢哋就為「Cheetozard」搵咗個新盒，後來特登整咗個模仿Pokemon卡牌嘅收藏盒。近日拍賣完成後亦有唔少去恭喜佢哋投資獲利。

在 Instagram 查看這則貼文

1st and Goal Collectibles（@1standgoal_collectibles）分享的貼文

零食拍賣雖然並不多見，但亦不是絕無僅有。事實上eBay上亦可以搵到各種奇形怪狀嘅奇多拍賣，其中一舊形似海馬嘅於去年以179美金（約HK$1,400）賣出。2021年時亦有一名13歲澳洲少女搵到一舊正三角形嘅Doritos，最終品牌以2萬美金向少女收購。

資料來源：mensjournal