繼《美國隊長4：勇敢新世界》之後，迪士尼下部大作真人版《白雪公主》將於本月20日正式上映。不過業界就唔多睇好開畫成績，最初預計該片有望在北美上映首周末斬獲7,000萬美元，但近日就下調至4,800至5,800萬美元。對於一部成本高達2.7億美元嘅電影嘅講，絕對唔係一個好消息。

據外媒《THR》報導，由拉丁裔女星Rachel Zegler主演嘅真人版《白雪公主》，預計北美開畫首周末票房可達4,800-5,800萬美元。呢個數字單睇其實唔算太差，就算以最差情況只收4,800萬美元嚟計，仍然可以輕鬆成為今年北美開畫票房亞軍（截止目前）。不過，如果同迪士尼以往嘅真人版翻拍電影相比，呢個成績就真係有點遜色，勉強跑贏2019年嘅真人版《小飛象》、《黑魔后2》，以及去年底上映嘅《獅子王：木法沙》等等，而且考慮到《白雪公主》呢個經典IP嘅號召力，呢個成績確實難以令人滿意。

迪士尼真人版改編電影北美開畫票房排行榜（2015年起計）：

1.真人版《獅子王》- 1億9170萬美元（2019年）

2.真人版《美女與野獸》- 1億7475萬美元（2017年）

3.《魔幻森林》-  1億326萬美元（2016年）

4.真人版《小魚仙》- 9557萬美元（2023年）

5.真人版《阿拉丁》- 9150萬美元（2019年）

6.《仙履奇緣》- 6787萬美元（2015年）

7.真人版《小飛象》- 4599萬美元（2019年）

8.《黑魔后2》- 3694萬美元（2019年）

9.《獅子王：木法沙》- 3540萬美元（2024年）

10.《黑白魔后》- 2149萬美元（2021年）

另一方面，電影上映後，每周票房通常一路遞減，所以如果開畫成績唔高，最終票房亦難以理想，加上《白雪公主》製作成本高達2.7億美元，回本之路可以話係相當艱難。

當然凡事總有例外，例如成本2億美元、於去年底上映嘅《獅子王：木法沙》，雖然北美開畫票房得3,540萬美元，但海外市場反應熱烈，最終全球累計票房高達7.02億美元，總算達到收支平衡。唔知《白雪公主》又可唔可以靠海外觀眾撐起盤數？又或者開畫成績超出預期，爆冷大收，令班預測機構集體炒車？咁就要等電影正式上畫先知啦！