法國影后Marion Cotillard向來以演技精湛見稱，2007年更憑住《La Vie en Rose》橫掃法國、英國及美國三地后殊榮，實力無庸置疑。不過即使係影后級人馬，都難免有失手時刻，2012年佢喺《蝙蝠俠：夜神起義》扮演Talia al Ghul時，就因為角色死臨終前嗰段「抽搐式」演繹太過突兀，所以經常被影迷拎返出嚟抽水同鞭屍。對於呢段「黑歷史」，Marion Cotillard最近就向傳媒直認自己當時確實太緊張，搞禍咗。

Marion Cotillard日前接受《Les rencontres du Papotin》訪問時就大方承認：「我冇演好嗰場戲，我搵唔到啱嘅位置同方法，緊張到硬晒軚...。有時候你就係會搞禍某些事件，所以，我搞禍咗。」

事實上，Marion Cotillard喺2016年都曾經公開談論過呢一幕，當時佢就認為觀眾反應過度：「有時拍嘢確實會有甩轆嘅時候，睇完成品我都心諗：『點解唔揀過第二個take嘅？』但我認為怪責得邊個，一係就怪晒所有人，一係就唔好怪何任人。但係我覺觀眾反應太大，明明我其他部分都交足功課，點知個個淨係記得我嗰幕『瀕死抽搐』，確實令人困擾。」雖然個別場景甩轆，但都無阻電影在全球大收10.85億美元票房，至今在IMDb仍然高達8.4/10分，係唔少影迷心目中嘅神作。