由於日圓持續低水，加上部份遊戲只限日區獨家上架，多年嚟有唔少Switch機主都會「跨區」到日本eShop購買數位版遊戲。不過最新任天堂宣布，未來日區Nintendo eShop與My Nintendo Store將全面封殺海外信用卡及PayPal付款，各位機迷日後想轉區買平Game就冇咁方便喇。

「日本国内向け『ニンテンドーeショップ』『My Nintendo Store』における海外発行クレジットカードおよび海外で開設されたPayPalアカウントの取り扱い終了について」を掲載しました。 https://t.co/97JTmLGT3X pic.twitter.com/aY17lMTOfj

— 任天堂サポート (@nintendo_cs) January 30, 2025

任天堂在公告中表示，為防範「不正當使用」行為，由今年3月25日起，日區Nintendo eShop與My Nintendo Store將不再接受使用海外信用卡付款，意味過往使用海外信用卡或海外PayPal付款嘅玩家，日後必須改用日本金融機構發行嘅信用卡、日本註冊PayPal帳戶、或者日區點數卡（Nintendo預付序號）等方式付款。對此，有網民就猜測係因為Switch 2即將推出，任天堂希望透過此手段限制黃牛大批掃貨，就算未能完全杜絕，都能夠減少便利度。

雖然仲可以用日區點數卡買Game，但建議大家從官方渠道(例如日本Amazon)或可信嘅代購商入手序號，而且要計清楚匯率，否則可能直接喺港區買Game仲抵！