即將於2月28日發售嘅《Monster Hunter》續作《Monster Hunter Wilds》，無疑係2025年初最值得大家期待嘅大作。而為咗回應唔少Fans都反映錯過早前舉行嘅首次公測（Open Beta Test, OBT），Capcom近日就宣佈會於2月中舉行第二次公測（OBT2），順手於發售前衝一波人氣。不過有眼利嘅網民發現，Capcom此舉好可能會「逼死」另一大廠Ubisoft。

Capcom官方YouTube日前上傳由《Monster Hunter Wilds》製作人辻本良三主持嘅「公開測試2予告」，當中前半段基本就係睇住辻本良三創作角色以及狩獵「毒怪鳥」，後半段先正式介紹「公開測試2」嘅內容。據辻本良三指出，舉行「公開測試2」嘅原因，係因為好多Fans都反映錯過咗上次嘅「公開測試1」，所以「公開測試2」嘅目的其實係畀機會大家試多次，而非有咩新嘢畀大家試。

事實上「公開測試2」嘅絕大部份內容都同「公開測試1」一模一樣，玩家可以創建角色、進行故事體驗任務以及狩獵今集新魔物「闢獸」；而Capcom雖然有聽到「公開測試1」後嘅玩家意見，並正進行修正，但相關修正唔會出現於「公開測試2」之中，所以兩次公測嘅最大差別只在於「公開測試2」多咗「毒怪鳥」可以狩獵，叫做多少少嘢玩。另外公開測試中創建嘅角色可以繼承到正式遊戲（但進度要重新開始），同時玩家亦會獲得遊戲中嘅飾品作為獎勵。

講咗咁多，點解《Monster Hunter Wilds》搞公測又會關Ubisoft事呢？原因就在於公測日期。據影片中公佈，公測會分成兩段時間進行，分別香港時間係2月7日早上11點到2月10日早上10點59分；以及2月14日早上11點到2月17日早上10點59分。而2月14日正正就係Ubisoft推出「充滿話題」嘅《Assassin's Creed Shadow》嘅大日子。考慮到目前兩作於玩家心目中嘅地位，大家好可能會選擇玩《Monster Hunter Wilds》公測都唔去玩《Assassin's Creed Shadow》，所以預告下方唔少人都笑稱Capcom逼死Ubisoft。