近年Sony積極將旗下遊戲改編成影視作品，繼《最後生還者》、《秘境探險》、《GT賽車》後，官方今日就宣布下批改編作品將會係《對馬戰鬼》、《絕地戰兵》以及《地平線 零之曙光》，而HBO人氣劇集《最後生還者》第二季亦會在今年4月正式播出。

Sony今日在CES 2025會上宣布，由Sucker Punch Productions開發嘅動作冒險遊戲《對馬戰鬼》將會推出動畫，以「奇譚模式」為基礎呈現出傳統武士美學，並由Aniplex與神風動畫操刀、水野貴信執導、虛淵玄負責故事構成，預計2027年在Sony旗下串流平台Crunchyroll播出。順帶一提，目前Sony同時籌備緊《對馬戰鬼》真人版電影，並搵嚟《John Wick》系列導演Chad Stahelski執導，但由2021年宣布至今仍然未有太多消息，只知會採用全日本演員陣容及日語發音。

除此之外，Sony亦在會上宣布將推出《地平線 零之曙光》及《絕地戰兵2》真人版電影，前者將由Columbia Pictures及PlayStation Productions聯手製作，講述主角Aloy在未來衰敗世界中嘅起源故事。透露嘅消息並唔多，有待官方後續公布。

最後，HBO人氣劇集《最後生還者》第二季正式宣布今日4月播出，並同步公開最新預告，唔知Joel嘅結局會唔會跟足原著呢？

記者會全片：