作為目前整個荷里活不論對觀眾定演員都最有號召力嘅導演，Christopher Nolan嘅下一部電影拍啲咩、同咩人合作自然引起大家關注——你話佢下一部電影咪《The Odyssey》、演員陣容都知道哂？係，冇錯，但Nolan嘅魅力，就係大到佢「下一部電影」都未開拍，就已經有「下下部」電影嘅傳聞出現！

話說外國著名荷里活記者Daniel Richtman早前於其Patreon中爆料，指Christopher Nolan目前除咗準備緊《The Odyssey》之外，其實已經著手開發再下一部作品。Daniel Richtman並無提及呢部「再下一部電影」嘅主題或劇情，但就強調Robert Downey Jr.將會係當中嘅要角之一，換言之二人有望於去年嘅《Oppenheimer》後再次合作。

《Oppenheimer》對Nolan以及RDJ黎講都係非常成功嘅作品，二人亦係憑佢於去年嘅奧斯卡頒發禮上獲得生涯首座小金人（Nolan拎最佳電影及最佳導演，RDJ拎最佳男配角），所以雙方「食過翻尋味」再次合作似乎亦相當合理。

但要留意嘅係，考慮到《The Odyssey》嘅拍攝時間，Nolan最快要到今年下半年先有時間開拍呢部目前不知名嘅新作，而同期RDJ亦應該忙於拍攝Marvel嘅《Avengers: Doomsday》，應該要到2026年先有時間，如果RDJ仲要出演2026年上映嘅《Spider-Man 4》又或2027年上映嘅《Avengers: Secret Wars》就更加忙，可能要到2027年先能夠參與拍攝，即係電影最快都可能要2028年先上映。

當然，以上一切目前都只係傳聞及推測，唯有靜待官方進一步消息先可以進一步確定。

資料來源：maxblizz