於《Elden Ring》中，玩家能夠為「月之公主」菈妮親手戴上「暗月戒指」，並成為佢認可嘅「王」以及「永恆伴侶」，甚至最終改變結局走向，是故菈妮一直係《Elden Ring》玩家們口中嘅「老婆」。而現實中嘅你又想唔想娶個菈妮返屋企？有日本廠商近日就推出仿照遊戲設定而製嘅「暗月戒指」，只要入手，你同成為「菈妮老公」嘅距離，就只係差「搵到菈妮」咋！

話說日本著名玩具店「豆魚雷（Mamegyorai）」旗下有個叫「TorchTorch」嘅品牌，專為Bandai Namco旗下部份遊戲推出服飾週邊，當中就包括所有《Dark Souls》、《Bloodborne》、《隻狼》以至《Elden Ring》等由FromSoftware及宮崎英高開發嘅遊戲。而其中最新推出嘅，就有來自《Elden Ring》中嘅「暗月戒指」。

戒指本體用上「銀925」製作，並由造形作家「大畠雅人」重現遊戲中戒指嘅複雜花紋。寶石位置則用上人手打磨嘅天然水晶，外噴藍色特別塗層、內襯三層薄銀以營造出深邃嘅色調。都唔好講隻戒指設計本身靚唔靚，淨係實物圖同遊戲圖放埋一齊毫無違和感，就知道還原度相當高。而且只係賣29,700Yen（約HK$1,460），送畀大家現實生活中嘅菈妮都不失為好選擇。

但如果你話你搵唔到菈妮又點呢？其實TorchTorch過去都出過唔少仿照《Dark Souls》、《Elden Ring》道具而成嘅飾物。例如大家非常熟悉嘅提高精力回復速度嘅「綠花戒」、加血加精力加重量上限嘅「寵愛庇佑戒指」、增加靈魂量（遊戲內嘅錢）嘅「貪婪銀蛇戒指」、以及消除下落傷害嘅「銀貓戒指」等，只要你係《Dark Souls》或《Elden Ring》迷就總有一款啱你心水。

資料來源：torchtorch.jp