去年11月Sony推出Playstation Portal，一部價值2000銀、本身冇運算能力、必須與家中PS5處於同一個網絡之下先用到嘅「手提遊戲機」，當時唔少人都認為其功能非常雞肋，必定失敗收場。但撇除早前Sony宣佈有望開放「雲端遊戲」之外，單從近一年來PS Portal嘅數用數據顯示，PS Portal好可能搵到屬於自己嘅一片天，甚至可以話係非常成功嘅產品。

據外媒《Game File》報導，佢哋近日從Sony Interactive Entertainment（SIE）產品管理部副總裁「若井宏美」口中得知，PS Portal嘅高峰使用時間為晚上九點，比起PS5主機嘅高峰使用時間晚上八點稍晚。對此，Sony嘅推測係「玩家先用PS5打機，然後夜啲就轉用PS Portal去另一間房繼續打，讓部電視出黎畀其他家人用」。換言之，PS Portal其實係「一組可以拎黎拎去嘅主機加電視」，能夠解決屋企人「爭電視」或者「爭客廳」嘅問題。 

圖片：demandsage

而且你唔好睇少呢個「土地問題」。據網上資料顯示，美國玩家中有超過80%都係18歲以上成年人，當中18至34歲、以及35至44歲組別加埋就已佔超過半數，換言之當中有好多人好可能已經成家立室、有小朋友。試想像你打打下機但老婆想睇電視，又或小朋友要喺個廳做功課，呢個時候你就可以拎部PS Portal出黎入房繼續打，解決家庭糾紛仲延長玩家遊玩時間。所以PS Portal雖然未必每個人都適用，但的確能夠成功解決問題。

資料來源：Game File