著名物理學家霍金生前曾多次作出預言，指除非人類逃離地球，否則就會於百年之內因為各種原因而滅絕。咁假若霍金預言成真，人類滅絕或離開地球後，又有邊一種生物有機會取代人類，成為下一個地球文明創始者呢？近日英國牛津生物學教授Tim Coulson就作出推測，認為八爪魚係其中一位大熱門「選手」。

話說Tim Coulson教授近排出咗本討論人類生物發展史嘅新書，而外媒《The European》訪問佢時，就要求佢猜想一個人類滅絕後嘅世界，並問到其他靈長類動物係咪會接棒創立下一個文明。對此Tim Coulson教授指出，雖然黑猩猩等靈長類動物非常聰明，亦有住同人類非常相似嘅身體結構（例如擁有拇指，可以使用工具；又或可以兩足行走），但正因為太相似，所以任何導致人類滅絕嘅危機，都好可能令靈長類動物同時滅絕。而其他出名聰名嘅動物例如海豚或某啲雀鳥（例如烏鴉）又缺乏「建立文明嘅精細技術」，所以佢最睇好嘅「繼任人」其實係八爪魚。

Tim Coulson教授指八爪魚係地球上其中一種最有智慧、最具適應力以及最足智多謀嘅生物。佢哋能夠自行解決複雜嘅問題、能夠透過身體閃爍互相溝通，甚至能夠因應環境精確地改變顏色以偽裝自己。同時八爪魚擁有先進而反散嘅神經系統，令佢地能夠適應人類消費失之後可能變得難以預測嘅新世界，故最有可能於地球上搵到一片能拙壯發展嘅小空間，繼而建立出屬於佢哋嘅文明。

唔知大家聽完Tim Coulson教授嘅分析，下次食八爪魚嘅時候會唔會覺得自己係食緊地球下一個主人翁呢？

資料來源：The European