Tom Holland喺完全唔知演咩嘅情況下，就馬上答應了Christopher Nolan邀請。

早前同大家報導過，Christopher Nolan正在籌備新戲，預計最快明年初開拍，2026年7月17日上映，除咗Matt Damon正洽談擔任主角，Tom Holland亦有望參與演出。近日Tom Holland接受電視節目《Good Morning America》訪問時，就親口證實真有其事，同時透露《Spider-Man 4》將於明年夏季正式開拍。

在節目中，主持人問到係咪只要Christopher Nolan執導，唔使睇劇本都會馬上答應邀約，Tom Holland毫不猶豫地表示：「百分之百，毫無疑問。」並形容Nolan嘅邀約，係人生千載難逢嘅一通電話：「當呢個機會來臨時，對我嚟講真係人生中難得嘅一通電話。嗰種感覺令我諗返起10年前收到《Spider-Man》邀約嘅心情，絕對係一件令人驚喜嘅事，我亦感到非常自豪及興奮。」至於新作劇情細節，就連一向被稱為「爆料王」嘅Tom Holland亦守口如瓶：「聽住，我唯一能夠講嘅係我非常興奮同榮幸，事實上我亦只知道咁多。」

除此之外，Tom Holland亦提到《Spider-Man 4》將於明年夏季開拍，並深信觀眾會鍾意呢部作品：「我可以話畀大家嘅係，《Spider-Man 4》正蓄勢待發，我好有信心咁講呢個Idea非常勁爆，絕對值得Fans們期待。而我亦終於可以同大家講，《Spider-Man 4》會喺明年夏季開拍，呢部作品非常瘋狂，同之前嘅電影有啲唔同，但我深信Fans們會喜歡。」