為紀念《John Wick》系列10周年，導演Chad Stahelski及David Leitch日前接受外媒訪問，分享各種幕後製作秘聞，其中提到當年投資人希望Keanu Reeves剃鬚，以青靚白淨形象示人，但多得導演們堅持，才造就出John Wick經典鬍鬚殺手造型。

導演Chad Stahelski及David Leitch在訪問中表示，由於佢哋希望將《John Wick》打造成一部現代希臘神話式奇幻電影，風格一啲都唔主流，所以想Keanu Reeves搞搞新意思，認為留鬍更貼合角色形象。然而，投資者只係想見到觀眾所熟悉嘅Keanu Reeves，類似《Point Break（終極豪情）》、《Speed（生死時速）》以及《The Matrix（22世紀殺人網絡）》系列嘅青靚白淨造型。對此，兩位導演與資方展開過多次激烈爭論，對方甚至搬出「Keanu Reeves一定要保持青靚白淨，先可以打入國際市場」等說法。

雖然面對資方強烈反對，但兩位導演堅持讓Keanu Reeves在拍攝第一日以鬍鬚造型出鏡，後來資方翻睇片段時出奇地大讚，最後成功保留John Wick招牌鬍鬚殺手形象。

除咗鬍鬚造型，電影中狗狗被殺情節亦係一大爭議點，資方認為情節好晦氣、觀眾唔會想睇到呢種劇情。不過，導演就認為與殺狗情節相比，片中大量暴力殺人場面豈不是更令觀眾難以接受？而且作為一個類型電影迷，導演深知呢一幕能令觀眾印象深刻，有助推動劇情發展。最終呢一個設定亦成為Fans經常拎黎講笑嘅meme「千萬不要碰Keanu Reeves的愛犬」。

資料來源：variety