現年27歲嘅Sydney Sweeney近年憑著劇集《Euphoria》、性感浪漫電影《Anyone But You》中嘅激情演出及姣好身段，成為荷里活新一代性感女神。但近日佢於IG上公開自己準備已久嘅新戲造型，就一改過去嘅性感形象，變成一個手瓜起「展」（正字無法顯示）嘅大隻妹！真係睇相都認佢唔到呀！

Sydney Sweeney過去造型

Sydney Sweeney今日更新IG，上傳咗兩張新戲造型嘅幕後照。只見相中嘅佢留住一頭同史泰龍有幾分似嘅長鬈髮、身穿紅色背及灰色棉褲，同以往嘅性感美貌造型相距甚遠。相距更遠嘅仲有佢嘅身型。以往玲瓏浮凸嘅佢，新造型下唔單止變得虎背雄腰，其中一張相更可以見到佢手瓜起「展」。

帖文中Sydney Sweeney表示自己「過去幾個月來，我為了演活一個非凡的女性、一個場上及場下都在戰鬥的真正冠軍，而沉浸在訓練之中。這位女性的人生歷程見證堅毅、力量及希望。我很榮幸可以站在她的角度，向大家分享這個充滿力量的故事。」

Christy Martin及Jim Martin

在 Instagram 查看這則貼文

Sydney Sweeney（@sydney_sweeney）分享的貼文

其實Sydney Sweeney係接拍咗以由David Michod執導，以女拳擊手Christy Martin為主角嘅傳記電影，所以先會有呢個「大隻妹」造型。除Sydney Sweeney外，曾出演《Six Feet Under》、《X-Men: The Last Stand》嘅男星Ben Foster亦有份，從造型黎睇應該係飾演Christy Martin的丈夫Jim Martin。

Christy Martin從1989年起進入拳擊界，到2012年退役時成績為49勝7負3和。2016年成為首位被選入內華達拳擊名人堂嘅女拳手，2020再成為首位入選國際拳擊名人堂嘅女拳手。而除其拳擊生涯外，Christy Martin最有名嘅事件就係2010年被時任丈夫James（Jim） V. Martin用刀及槍襲擊而重傷，但隨後佢克服傷勢並短暫從回賽場。而Jim Martin則於2012年被判第二級意圖殺人而被判監25年。