由Todd Philips執導、Joaquin Phoenix及Lady Gaga主演嘅《Joker: Folie à Deux（小丑：雙瘋）》上周五在北美正式開畫，首周未三日僅收4,000萬美元票房遜預期，不及前作開畫成績二分之一。而口碑方面亦相當麻麻，其中影評調查公司「CinemaScore」更交出D級評價，比2015年版《神奇4俠》、《魔比煞》、《Marvel隊長2》更差，成為該平台最低分嘅漫改電影。

業界原先預計《Joker2》北美開畫票房能超過7,000萬美元，其後隨住口碑持續下跌，進一步下調至5,000萬美元，但最終成績仍低於預期僅收4,000萬美元，不及前作開畫成績9,620萬一半。話雖如此，電影在海外市場表現反而唔錯，共有8,100萬美元收入，加埋嘅話全球開畫票房都有1.2億美元。

除咗票房慘淡，唔少觀眾都對今部續集非常失望，更笑稱入完戲院後發現原來自己先係小丑。電影口碑在各大影評網站持續插水，截至目前IMDb評分為5.3、Metascore評分為45/100、爛番茄評分為33%新鮮度及30%影迷評分，而影評調查公司CinemaScore更罕有地交出D級評價，比當年被人插爆嘅《魔比煞》(C+)更差。

據了解，《Joker2》成本高達2億美元，最終票房至少要4.5億美元先能達到收支平衡，但以呢個開畫成績同口碑，要回本絕對有難度。