《機動警察》原版電視動畫雖然只於1989年至1990播放大約一年時間，但出色嘅劇情、世界觀及機體設定，令作品深受動漫迷喜愛，隨後仲出過三部OVA，日本方面製作嘅1:1「英格倫」每次出巡都成為熱話。而近日《機》官方網站就發文表示，2017年宣佈嘅動畫續作將會於2026年正式開始製作，換言之「未來警察後年就會出發」啦！

圖片：patlabor.tokyo

自2002年嘅第三部OVA後，整個《機動警察》系列就再無新嘅作品播放。2017年時曾經於法國安錫國際動畫影展宣佈過會製作新動畫，但又一直都無下文。直到上週末，《機》嘅官方網站先係公佈會於日本重映1989年上映嘅第一集OVA，隨後就公佈系列新動畫《機動警察 EZY》將於2026年正式開始製作，同時公佈咗更新部份「英格倫」機體設定嘅新海報，以及幾張新動畫嘅截圖。

圖片：patlabor.tokyo

製作人員方面就大部份都係老面孔。原版動畫及OVA中負責機體設定嘅「出渕裕」接任監督，「伊藤和典」回歸擔任編劇，「結城正美」及「高田明美」亦分別擔任角色設計及服裝設計，而機體設定就交畀近年負責過《水星的魔女》等多部高達作品嘅海老川兼武、以及參與過新《EVA》劇場版嘅「渭原敏明」接手。

資料來源：patlabor.tokyo