最近Denis Villeneuve接受《Vanity Fair》訪問，分享對《沙丘》改編電影嘅看法，表示前兩集《沙丘瀚戰》就好似一幅雙聯畫(Diptych，指可以對摺嘅兩面畫作)，事關兩部電影都係改編自原著小說第一本書，接住落嘅第三集《Dune: Messiah（暫譯：沙丘：救世主）》將截然不同，自己亦唔會將三部作品視為一套「三部曲」。

對於未來發展，Denis Villeneuve坦言自己已專注改編《沙丘》多年(由2018年至今)，好想做下其他事情，所以拍完《沙丘：救世主》就會退出《沙丘》系列。與此同時，考慮到後續小說相當深奧，非常難以改編，佢會在《沙丘：救世主》埋好伏筆，好讓其他導演日後能夠接手。

《沙丘：救世主》設定在首部《沙丘》小說12年後，講述Paul Atreides已經成為宇宙中嘅皇帝，卻發現自己嘅權力並冇帶嚟想像中嘅和平，反而引起更多衝突...。被問到如何讓Timothée Chalamet、Zendaya、Florence Pugh顯得更加年老時，Denis Villeneuve只係話已經諗到點做，但未有分享具體細節，電影預計在2026年12月上映。