早前嘅奧運閉幕禮中，Tom Cruise從天而降接過奧妥會旗幟，拎住支旗騎電單車穿越巴黎、登上飛機，再跳傘降落於洛杉磯地標荷里活標誌之上，當中Tom Cruise離開會場之後嘅片段當然係預先拍好再播出黎。而近日負責管理荷里活標誌嘅信託基金會主席Jeff Zarrinnam接受外媒訪問時，就透露Tom Cruise於拍攝時創下咗一個前無古人嘅歷史紀錄：用手摸個荷里活標誌。

閉幕禮精華片段

Jeff Zarrinnam早前就借出荷里活標誌予Tom Cruise團隊拍攝一事而接受《NBC》訪問。佢首先談到為咗確保能夠於閉幕禮時帶來驚喜，所以整個拍攝都被嚴格保密，甚至連荷里活標誌附近嘅保安鏡頭都被關閉，以防任何畫面流出。另外佢亦提到於為期兩日嘅拍攝中，Tom Cruise並唔係揸車或坐車到達荷里活標誌，而係自己揸直升機直接降落於山上嘅直升機坪——只能夠講「非常Tom Cruise」。

圖片：Olympic

圖片：TMZ

於閉幕禮影片最後，可以見到Tom Cruise企喺荷里活標誌之上，而隨鏡頭拉遠，更可以見到結合「Hollywood」中嘅兩「0」而成嘅奧運標誌。而正正係呢個畫面，令Tom Cruise創下一個史無前例嘅紀錄：親手摸到荷里活標誌。據Jeff Zarrinnam講，雖然過去荷里活標誌曾多次被借黎拍攝，但一般而言「冇人可以掂個標誌」，而Tom Cruise不單止掂咗，仲爬埋上去踩住個標誌嘅支撐鐵架，「呢次係第一次有人真係掂到個荷里活標誌。」

資料來源：NBC