早前公開嘅《Captain America: Brave New World》（以下簡稱《美隊4》）公開咗「福伯」Harrison Ford接任「羅斯將軍（Thunderbolt Ross）」一角（原演員William Hurt於2022年離世），並將於電影中變身成「紅浩克」。有鑑於今次係「福伯」首次加入Marvel電影，所以早前有傳媒就問佢變身成「紅浩克」嘅過程，點知「福伯」竟然語出驚人，表示「需要乜都唔好理（not caring），需要做一個只為錢的白痴（being an idiot for money）。」

話說《Variety》早前於San Diego Comic Con訪問福伯，並問佢「變身成『紅浩克』需要準備啲咩」。記者原本想問嘅係係咪要化好耐妝、著特製戲服、於綠幕前拍攝咁，但福伯就非常精靈咁答：「需要你乜都唔好理、需要做個為錢嘅白痴。」但你又唔好以為福佰係嘲笑緊Marvel電影喎，因為佢隨後就話，「我都做過啲咁嘅嘢呀。我唔係要貶低佢，我只係話（變身成紅浩克）需要你做啲你阿媽，或者你嘅演技老師唔想你做嘅嘢。但咁樣好有趣，而我亦好享受。我玩得好開心，亦非常滿意大家對於預告嘅反應。」

而福伯接受另一傳媒《Screenrant》訪問時，亦大力讚揚《美隊4》嘅演員及製作單位。「今次係完全不一樣嘅體驗。你要解放一啲平時有嘅想像力約束，處理起來好有趣亦好愉快。同我合作嘅人亦非常美妙，導演Julius Onah做得好好，與Mackie先生（Anthony Mackie，新美隊）合作好有趣。我們都有一段快樂時光。」

資料來源：Variety