作為日本嘅千年古都，京都擁有極為深厚嘅歷史及文代底蘊，亦令當地人對於「京都人」身份極為自豪——反過黎講，就係非常睇唔起非京都人——從而衍生出京都人「明褒暗諷」嘅說話方式，亦即所謂嘅「いけず文化」。而近日京都就有廠商基於大熱桌遊「狼人殺」，開發出京都人版本「京都人狼」，遊戲目的唔再係搵出邊個係殺死村民嘅狼人，而係於一群對你「明褒暗諷」嘅京都人中，搵出真心稱讚你嘅「率直京都人」！

呢個「京都人狼」遊戲係由京都公司「株式会社CHAHANG」與大阪公司「ない株式会社」合作開發。遊戲玩法同「狼人殺」非常相似，玩家們先抽牌決定出「外鄉人」，其餘玩家則自動成為「京都人」，當中包含要真心稱讚外鄉人係「率直京都人」，又或以京都方式「明褒暗諷」嘅「機心京都人」。然後一眾「京都人」再抽出「本音卡」，以決定佢哋要以咩主題黎稱讚外鄉人。而「外鄉人」嘅目的，就係一邊聽京都人嘅稱讚，一邊搵出真心讚緊佢嘅「率直京都人」。

值得一提嘅係，如同「狼人殺」中有可以睇穿玩家身份嘅「占卜師」，「京都人狼」中亦有類似角色，不過個名就叫「滋賀人」，原因係滋賀縣位於京都隔離，所以當地人非常熟悉京都人講嘢方法。

除咗遊戲玩法外，遊戲卡牌本身都充滿對京都人嘅諷刺。例如卡牌係用上兩種高級和紙貼成正反面，以表達出「京都人的兩面性」；身份牌上就用上單單一個片假名「カ(ka)」就有11種寫法、日本人都未必睇唔明嘅「変体仮名」書法，以表達京都人自覺傲視全日本嘅文化氣息。

「京都人狼」官方售價為5,000Yen（約HK$260），於京都市內多間商店，又或「京都 昌幸堂」及「吉田山荘」嘅網站有售。同時亦可以作為京都「故鄉納稅」（即納稅人自願將稅款捐畀其他縣）嘅返禮而獲得。

資料來源：PRTIMES