任天堂昨晚突然公開一段名為《笑臉男（笑み男）》嘅神祕宣傳片，更特別喺片頭加上警告字句「本影片內容可以令人情緒不安，敬請留意。」隨即引起玩家們紛紛討論，猜測向來合家歡嘅任天堂即將推出自家恐怖遊戲。

《笑臉男》預告片內容不多，只有短短19秒，畫面全程係一個頭戴笑臉紙袋、身穿大褸嘅男人站在燈光昏暗嘅牆邊，期間更閃過一個Close-Up鏡頭，彷彿笑臉男正狠狠盯著觀眾，配上詭異背景音樂，整體氣氛令不寒而慄。官方並未透露太多信息，只在說明欄留下「#WhoIsEmio」「#誰是笑臉男」兩個標籤，唔少網友認為任天堂係宣傳緊一款即將推出嘅恐怖新作，而且片中並冇其他遊樂公司嘅LOGO及資訊，所以估計係任天堂嘅自家作品。

值得一提嘅係，該宣傳片亦分別上傳到美國、歐洲、澳洲等地任天堂官方Youtube頻道，其中美國版就打上ESRB M級標籤，即係只符合17歲以上嘅人士遊玩，而英國版更打上PEGI 18標籤，即對象為18歲以上人士，睇嚟呢款新作將會係成人向作品，詳情有待官方後續公布。