曾經風靡一時嘅MCU近年人氣每況愈下，評價及票房都大不如前，大家亦紛紛討論起「超級英雄疲勞」一詞。不過，曾執導《美國隊長2 & 3》及《復仇者聯盟 3 & 4》嘅羅素兄弟就認為，MCU嘅失利唔能夠完全歸咎於「超級英雄疲勞」，而係大眾接收資訊嘅方式有所變化，呢個係成個荷里活所面臨嘅問題，唔單只MCU受到影響。

最近羅素兄弟（Russo Brothers）接受《GamesRadar+》訪問，被問到如何看待MCU目前困境時，佢咃認為原因係人們接收資訊方式變遷：「我認為係反映緊現今情況，而家一切都好困難，係一個好微妙嘅時刻。我認為我哋正處於一個過渡時期，人們仲未清楚要如何接收故事，或者佢哋想要咩類型嘅故事。對於如何接收媒體資訊，目前存在一個巨大世代分歧，有一代人習慣預約式觀影，喺某一個日子去戲院睇某部作品，但呢個模式已漸漸過時。新一代人嘅諗法係『我而家想要，就要立即獲得』，然後就去做另一件事，並且會一心多用，處理緊一件事嘅同時，再額外處理其他事情。你知啦，呢個係同過往截然不同嘅時代，我認為所有人，包括Marvel，都經歷緊呢個過渡期，而我認為呢樣先係背後嘅主因。」

Joe Russo續指，呢個唔單只係電影及電視業所面臨嘅問題，而係成個世界都面對緊，同時強調問題難以解決：「我哋從未試過咁集體地、全球地，好似而家咁密切同迅速處理彼此嘅對話，從而衍生出一個問題──過度處理，我哋唔再關心上文下理，習慣透過meme及新聞標題進行溝通，冇人會睇得多過兩行句子，所以所有嘢都係會100個字之內，又或者好似社群平台上只有10秒嘅短片。擁有超過100年歷史，大約兩個小時嘅電影形式喺呢個瞬息萬變嘅時代已經出現重複感，不過要改變又係一件相當困難嘅事。我認為新一代人會搵到新嘅方式講述故事，嚟服務佢哋嘅集體過度活躍症（ADHD）。」

至於外界所指嘅「超級英雄疲勞」現象，Anthony Russo就認為同超級英雄電影呢個類型無關，而係一種「整體疲勞」：「『超級英雄疲勞』老早就存在，我哋早期拍超級英雄片嗰時已經有人講緊，所以係一種永恆嘅抱怨。觀眾都曾對西部片（Western film）有過類似嘅抱怨，但係呢類電影都持續拍咗幾十年，而且不斷推陳出新並至新嘅高度。」