自從Iron Man、Captain America、Black Widow等元老英雄於2019年《Avengers: Endgame》光榮退場，MCU人氣每況愈下，電影風評及票房都大不如前，劇集方面更被批評得體無完膚，甚至一度有傳Marvel計劃邀請多位初代復仇者回歸救場。最近Robert Downey Jr.接受訪問時就明確表示樂意回歸MCU，唔知大家有冇機會喺大銀幕再次見到Iron Man呢？

於上月憑《奧本海默》奪得首座奧斯卡小金人嘅Robert Downey Jr.日前接受《Esquire》雜誌專訪，被問到獲獎後會否願意回歸MCU時，RDJ交出肯定嘅答覆：「非常樂意。佢係我DNA入面不可或缺嘅一部份，呢個角色選擇了我。我成日都話，你永遠唔好同Kevin Feige（Marvel Studios主席）打賭，你一定會輸，因為佢係揸莊，佢永遠都會贏。」

話雖如此，但Kevin Feige曾於去年12月向《Vanity Fair》雜誌明確表示，RDJ飾演嘅Iron Man絕對唔會回歸，事關佢哋唔想破壞《Avengers: Endgame》嘅完美結局：「我哋將會保留嗰個moment（指Iron Man壯烈犧牲一幕），唔會再觸及嗰一刻。為實現嗰個moment，我哋付出咗好多年努力，所以我哋永遠唔會想用任何神奇嘅方式扭轉過來。」唔知Kevin Feige得知RDJ嘅意願後會唔會回心轉意呢，或者可以透過多元宇宙變體嘅方式讓Iron Man重返MCU？