由稻垣理一郎原作、村田雄介作畫嘅美式足球運動漫畫《衝鋒21（台譯：光速蒙面俠21）》近日迎來21週年。為咗慶祝，漫畫於昨日發售嘅《Jump》第九期中推出特別連載，亦係原作於2009年結束後，時隔14年有多嘅再次連載。

從《Jump》官方YouTube上公佈嘅PV中可見，此次特別連載名為《Brain X Brave》，據知故事將講述瀨那等人升讀大學後嘅美式足球比賽。幫大家回憶一下，原作最後一話中，瀨那、門太、小陸等人加入栗田、雲水、水町及功太郎等人就讀嘅炎馬大學；蛭魔、阿含、一休、赤羽、大和及鷹就入讀最京大；阿進、大田原及樓庭等人就直升王城大；武藏、基德、峨王等社會人士則組成「武藏工荒蠻人」。而蛭魔亦提過要打入「米飯盃」，與昔日嘅同伴再決高下。