著名實力派演員Gary Oldman戲路超廣，多年嚟詮釋過各式各樣角色，無論正派反派都難佢唔到，更於2018年憑《Darkest Hour（黑暗對峙）》榮登奧斯卡影帝。佢最近接受Podcast節目《Happy Sad Confused》訪問時就提到《哈利波特》嘅演出經歷，並認為自己當年演得唔夠好。

Gary Oldman於節目上坦言：「我覺得自己喺《哈利波特》演得普普通通/平庸(mediocre)，真心的，如果我好似Alan Rickman（石內卜）咁讀過原著，提前知道角色會點樣發展，或者我會詮釋得更好。」與此同時，佢亦對自己演技非常嚴格，務求精益求精：「如果有日我睇完自己嘅作品，忍唔住大讚『天啊，我真係好犀利！』，咁將會係好悲傷嘅一日，因為我會希望下個演出要做得更加好。」

Gary Oldman於2004年首度加盟「哈利波特電影系列」，於《阿茲卡班的逃犯》飾演哈利·波特契爺天狼星·布萊克 （Sirius Black），直至2007年《鳳凰會的密令》隨住角色死亡退場，其後再於2011年《死神的聖物Ⅱ》短暫出現。