或者你會覺得，動漫聲優嘅工作講到尾就只係「配音」，似乎唔算係特別有意義嘅工作。但多年聲演《龍珠》主角悟空 (及悟飯、悟天)嘅日本著名聲優野沢雅子，幾年前就曾經於電視節目中分享一個令佢感受到「聲優之力」嘅事件。節目片段近日又因野沢雅子於第71屆菊池寬獎，並於致詞時表示：「最喜歡聲優這份工作」而被網民搵返出黎重溫，唔少人睇完都話「有洋蔥！」

野沢雅子さんの逸話って、数え切れないくらいあると思うんだけど、中でも、「これが…声優の力なのか…」って感動した伝説のエピソード
pic.twitter.com/DchvmbcISh

— 最多情報局 (@tyomateee) December 3, 2023

話說2019年時，野沢雅子與田中真弓 (《龍珠》無限、《魔神英雄傳》飛雲聲優) 以及山寺宏一 (《龍珠》天津飯、《星際牛仔》史派克) 三人一齊登上電視節目。席間野沢雅子提到，佢曾於某年2月收到某位父親來信，該名父親指自己嘅兒子病重，好可能捱唔過二月，「佢好鍾意《龍珠》，可以向你要一張簽名板嗎？」野沢雅子睇完信後，就決定改以錄音鼓勵該名孩子：「喲！我是悟空！劇場版8月就要上映了，你一定要來看喔！我在電影院等你！約定了哦！」

而野沢雅子嘅鼓勵似乎非常有用，因為到8月劇場版上映後，野沢雅子又收到該名父親嘅來信，表示：「我的孩子奇蹟地坐起來了，去看(劇場版)了，真的非常感謝你。」據野沢雅子所知，該名小孩不僅渡過2月，更真係入到場睇《龍珠》劇場版。由於該名小孩當時已經不能坐立，所以係連人帶床去到電影院，但入場後小孩堅持要坐起身，最後亦真係坐住睇哂成套劇場版。翌日該名小孩就離世。

野沢雅子表示，事後佢仲收到小孩醫生嘅來信，表示「我們一齊努力讀書，就係為咗延長人們的生命，但我們能做的始終有限。如今我終於知道動畫的力量了。」