早年日本曾經興起唔少表面煮嘢食、玩瑜珈，但實際上係「掛羊頭賣心口」嘅女性YouTuber。而以下落黎介紹嘅呢位，於YouTube上拍砌模型ASMR影片嘅「高嶺れい」，雖然嚴格上都屬於呢類YouTube創作者，但特別之處就在於佢真係專心砌模型，技術仲要有返咁上下。更重要嘅係，佢嘅本職竟然係個陪酒女郎！

話說今年4月時，「高嶺れい」創立個人YouTube頻道「キャバプラCabapla【高嶺れい】Gunpla Build ch」，其中「キャバプラCabapla」就係「陪酒孃 (キャバ 嬢)」及「高達模型 (ガンプラ)」嘅合成字，而影片中「高嶺れい」亦的確會著住陪酒孃風格嘅衫砌模型。但與其他類似YouTuber相比，「高嶺れい」除卻件衫比較特別之外，影片中嘅佢真係專心砌模型，並唔會賣弄身材。甚至佢個工作室仲有清洗模型部件用嘅聲波機、烘乾部件用嘅烘碗碟機、以及噴油專用嘅通風系統，比起唔少模型愛好者都更加專業。

圖片：rei_tkm on IG

但你又唔好以為佢只係某個高達宅女，為咗吸引眼球而整個人設出黎喎！事關佢個YouTube簡介中就寫明佢自己係「福岡中洲陪酒夜總會的陪酒孃」，如果你去睇佢個IG，就更加係充滿一般陪酒孃該有嘅燈紅酒綠。換言之佢真係一個陪酒孃，又真係鍾意砌模型！

目前「高嶺れい」個IG僅得不足七千追蹤，YouTube訂閱更係少得可憐嘅幾百人，但或者「專心砌模型嘅陪酒孃」呢條路線，可以為佢殺出一條血路？