AI生成圖片技術越趨成熟，雖然一面能夠協助創作者製作出自己喜愛或需要嘅圖片，但同時亦引起一啲新嘅版權糾紛。而最新嘅「受害者」，就有迪士尼旗下嘅「Pixar」工作室。面對近來網上興起嘅「兒童不宜Pixar風電影海報」熱潮，甚至號稱「地上最強」嘅迪士尼法務品出手都無法解決問題。

話說近來外國「4chan」討論區等地方開始興起「兒童不宜Pixar風電影海報」嘅熱潮。所謂「兒童不宜」並非指有裸露或血腥畫面，而係網民利用AI生成技術，創作Pixar動畫風格、但內容具有冒犯性，甚至「政治不正確」嘅虛構電影海報。其中包括大家都好熟悉嘅五男一女「Piper Perri Surrounded」梗圖；經典Cult片《Two Girls One Cup》；以及外國網絡非常著名、我警告大家千祈唔好Search原版黎睇嘅「One Man One Jar」等等。除此之外，仲有網民創作Pixar風希特拉與納粹、又或以集中營為主題嘅虛構電影《Caust》等。反正就係有幾冒犯得幾冒犯。

由於AI生成圖片實在太真，所以部份網民真係以為呢啲係Pixar電影。例如上面提到嘅《Caust》，目前於Google輸入「Caust」後，第一個推薦搜尋就係「Caust disney」，而搜尋結果就有嗰張虛構海報。作為「闔家歡」代表嘅迪士尼當然不能容忍，於是日前向Microsoft施壓，要求佢哋禁止用家利用其AI圖片生成技術「Dall-E」生成出迪士尼標誌，而Microsoft亦一度禁止用家使用「Disney」作為生成關鍵字。

但由於Disney只能控制自己嘅商標使用，無法禁止用家生成「迪士尼風格」或「Pixar風格」嘅圖片，換言之用家大可先製作圖片，再自己加上標誌，結果依然係一張幾可亂真嘅虛構海報。所以目前未知迪士尼究竟有咩方法可以制止類似行為。

資料來源：cartoonbrew、knowyourmeme