近年唔少遊戲商都將作品搬上大銀幕或改編成電視劇集，不過《GTA》系列母公司Take-Two Interactive就冇打算跟上潮流，認為製作遊戲比拍攝影視作品更易賺錢，風險更低。

最近Take-Two於財報會議上被問到會否仿效任天堂，將旗下《GTA》及《Red Dead Redemption》等著名IP改編成影視作品。對此，Take-Two總裁Strauss Zelnick坦言公司確實謹重地考慮過呢個問題，而目前亦有與獅門影業合作嘅《Borderlands（邊緣禁地）》以及與Netflix合作嘅《BioShock（生化奇兵）》兩部真人版電影製作當中，但如果要由自家出資製作，佢就認為唔值得花費心力及冒險。

曾於90年代初於二十世紀霍士擔任CEO，對電影電視業非常熟悉嘅Strauss Zelnick進一步解釋，如果Take-Two自行出資製作電影或劇集，改編成功嘅話固然令會財報成績更加亮麗，但呢件事成功率並唔高，事關電影及電視係非常困難而且充滿挑戰嘅產業，佢更希望將心力同資源投放在遊戲產業。

另外，佢亦認為即使將《GTA》授權畀其他電影公司製作，利潤亦遠低於賣遊戲所賺取嘅收入，並以《Barbie》真人版電影為例子，指出呢套咁成功嘅IP授權電影，美泰(Mattel)都只係從中獲得1.25億美元利潤（Take-Two上一季淨收入已經高達13億美元），若然改編失敗，更可能會損害IP形象，所以認為唔值得冒險。換言之，大家應該唔會見到《GTA》或《Red Dead Redemption》真人版電影，但咁都未嘗唔係一件好事？