隨住Netflix人氣劇集《魷魚遊戲》風靡全球，官方於去年宣布推出同名真人Show節目《魷魚遊戲：真人挑戰賽》（Squid Game: The Challenge），招募456名嚟自世界各地嘅參賽者，共同挑戰劇中各個高難度關卡，爭奪456萬美元巨額獎金。經過一年時間製作，官方日前正式公開預告片！

從預告可見，無論場景設計、工作人員及參賽者造型都跟足原住，節目除咗忠實還原123木頭人、玻璃橋、椪糖、拔河、彈波子等關卡，更加入海戰棋及夾公仔機等新玩意，為觀眾帶嚟更多刺激畫面。唔同嘅係，所有參賽者頸上都掛上收音咪，用作錄低選手們嘅對話及陰謀詭計，主辦方向參賽者所派發嘅食物亦唔係鐵盒便當，而係漢堡包配薯條。節目將於11月22日Netflix上架，總共有10集，究竟邊個可以成為現實版成奇勳，拎走巨額獎金呢？