自上月中編劇工會 (WGA) 宣佈與片方AMPTP達成初步協議後，持續咗超過4個月嘅「荷里活罷工」終於見到解決曙光，接下來只要與演員工會 (SAG-AFTRA) 傾掂數，荷里活就可以復常。但對於觀眾黎講，罷工完結可能就代表加價開始。因為據《Wall Street Journal》報導，Netflix有意於解決罷工後，提高無廣告訂閱嘅收費。簡單啲黎講，就係即係叫觀眾幫佢哋埋單。

事實上，近來多個串流平台都不約而同地加價。好似另一港人熟悉嘅串流平台Disney+ 咁，早前就宣佈會由11月1日起「更新」訂閱類別與價格，實際上就即係將原本每月HK$73計劃降格成「1080p」、「5.1聲道」及「同時兩部裝置觀看」，如果要保持「4K Ultra HD及HDR」、「杜比全景聲」及「同時四部裝置觀看」，就必須升級至每月HK$90嘅新方案。

而香港人冇咁熟悉嘅(HBO) Max、Paramount+及AMC Networks早前亦將月費加價1美金。

據《WSJ》報導，Netflix亦有意於解決荷里活罷工後，提高無廣告方案嘅價格。雖然目前未知道會加幾多、幾時加，但預計會由北美市場開始，逐漸推廣到全球多個市場。

荷里活罷工嘅主因之一，就係編劇及演員不滿串流平台漠視業界慣例，拒絕就重播作品向編劇、演員提供分成。而按WGA早前嘅公告，新協議會包含新嘅串流平台分成計算方法，換言之未來串流平台嘅播放成本會提升。所以假若Netflix真係加價，相信就係將相關成本轉嫁畀消費者啦。

資料來源：WSJ